Zintzilikarioen fabrikazio prozesua.

Praileaitz I haitzuloan egon zenak ordu asko eman zituen ibai bazterrak ondo miatzen, horien artean Deba ibaiarenak, ezaugarri zehatzeko uharrien bila (silueta iradokitzaileak, forma luzatuak, kolore beltza edo iluna, etab.). Bildu ondoren muturretako bat zulatu zien; horretarako, aldez aurretik, zulatu beharreko aldea prestatu zuen, batzuetan urradurak eginez, eta harria pixka bat pikatuz zulagailua errazago jartzeko eta zuloa erdiratzeko. Lan hori uharriaren bi aldeetatik egin zuen, puntadun tresna batekin mugimendu zirkularrak eginez etengabean, uharriaren bi aurpegietako zuloek erdi parean bat egin arte, zuloak forma bikonikoa hartzen zuelarik. Zintzilikarioa prestatu ondoren, ertzetako saihets eta aurpegietako batzuetan ebaki mota diferenteak egin zituen.