Gizakiak goi paleolitoan

Azaldutako natura ingurune horretan Homo sapiens sapiens, CroMagnon izenez ere ezaguna den gizakia bizi zen, gure zuzeneko arbasoa. Jaso ditugun ebidentzia arkeologikoek erakusten digute giza talde horien helburu bakarra ez zela bizirauteko elikagaiak bilatzea. Garai hartan, gizakiak talde txikitan bizi ziren eta eskura zituzten baliabideen aprobetxamendua planifikatzen zuten (suharria bezalako lehengaia, ehiza, arrantza, fruituak, etab.). Era berean, haitzuloetako eta aire zabaleko egonlekuak izan zuten erabilera eta bizi maiztasunaren araberako ezaugarriak zituzten: bizilekuak, ehiza edo arrantzarako lekuak, santutegiak eta bilguneak. Azken horiek, Isturitzekoa bezala Gravette aldian eta Erdi Madeleine aldian, funtsezkoak izango ziren talde ezberdinak elkartu eta beren arteko harremanak indartzeko, sinismenak berpiztu eta bateratzeko eta informazioak eta jakintzak trukatzeko.